Hebrews 12

1She azalo n mwa ɓai shi ya, wye nyi, yi ku akaya shanwoyi ya, yi ku a laifi fa nɓa shi yi nyi to ɓai ye ge ya gyi abye nyin. N nabai ya zan-zan dna n gaiciya n hakuri yi n Shekwoyi la shi n ya bye nyi.

2Yi shi Yesu nu awye, wo nu zhin yi gnabye. Vinyikwo to ɓei wo wo wa fi ntu ya laifi ɓon. Wo ɓei kpe ge kwo ɓa ɓe wo n mwa-mwai. Nsaiye kuwa wo tu lo n naba duduyi n kunsun n Shekwoyi n ʼshemi. 3Aza nukwoyi ɓei ga Yesu wahala, ama wa zhin hakuri. Yi dna wo wahala wye wa ze eyi gnabye. Deye ɓa bma yi zhin ya bwa kala. 4Kwo dama yi to shi gusun n laifi yi kwo n jarabai har yi la amisa kpe ɓedo n ami yin.

Shekwoyi ta-ta bmiya ntu yi ɓo

5Hola Shekwoyi ɓeda zamwi nu? Wo ɓei gna ge, “Omi nugun to gyi minagyi ʼsa Shekwoyi wa gaho tata. To bma bugba ya esa n wa wuho oho doknunu gbi m. 6Shekwoyi zhin wa dna owo aɓi zokwo wa ga ɓa tata. Sanu wo ga yi tata, kwo wu gye yi zhin wa nya nu.” 7Shekwoyi zhin yi-fi n zokwo shi aza je zhin oɓa ɓi fi n zokwo nyi. Zaho-zahoi ta mi wa shi n waɓi to wa dna wo zokwo m. Yi zhin wa ɓi nu, ntu cenu woi ga yi tata. 8Dole ata aɓi, oɓa dada ɓa zhin Ba fi n zokwo. Amma n Shekwoyi to ga ho tata m, ho to zhin wo nya nu m. 9Yi zhin ya ga ya dada mwa-mwa. Yi ta nya ɓa ɓo m, ɓai ya ga yi tatam. Ntu cenu yi gwo Shekwoyi tata n na gmadayi. Shekwoyi ye yi n du eya dada anyi nya. Wa ga yi tata ntu ge wo ye yi lo.

10Eya dada anyi nya dna yi zokwo aye fyewyi nu kawai. Amma Shekwoyi zokwo dna, gaiciya nu n saho-sahoi. Wo ye ya gwo wo gyi-gyi, wo ta zhin wye m. 11A tada oza sanu na ta won, sai dai ko la duya. Kwo zhin ha fa a zokwo nukwoyi ya vi zokwo do na gmada yi ɓedo lafiya yi.

12Laka la kwo da shike a laho ɓe, ha bwa kala njesun. 13Zhin ha pita zokwo manayi. Aza tna kala na nyasan yi n ɓa vi kwo ɓa ta miya ɓa wu ɓahin m. Amma ɓaɓa ku ze akala da dna n gaiciya ga.

14To je zaho-zahoi m, ha zan-zan gyi-gyi-yi cici, Ntu ge aza n ɓa to gyi-gyi-yi m, ɓa ta gye Shekwoyi wye m. 15Fye dna je wye n fye ɓa bwa Shekwoyi anabarka n fye to ye ge nuwun kwo lo fye a tasun. Ko zhin kwa ɓe n wahala yi, kwa to aza wye-wyeyi bwa. 16To fya zhin anagbayi m, to fya shi Shekwoyi lafya-lafya, n gye Isuwa m. Wo ɓei kun wo gado ntu mikun ɓo. Kwo ɓei zhin ɓo gboloyi nu n wa ba. 17Sanu awye ɓei kna wo ya, sai la duya, ko da shike wo ɓo ci bwi ntu wo laifi ɓo, ama duk gboloyi nu. Ato ɓei je woyem.

Shekwoyi begyi

18Ho to shin wahala sun n gye a Israila nya m. Ɓa ɓei ku lo ena, ɓa ku lo wyegma, ɓa ku lo ogma nukwoyi, aɓo deye ɓa ɓei gye ɓa n Sinai pe nu har ɓai wo edna njesun, Shekwoyi ɓei ga ɓa owo awyidna n ya nu. 19N wyihi, ɓa wo ai bye a kna-knaci, ɓa wo Shekwoyi begye n gye ogma har kwoi shan ekni ashan. Har ɓa gna Shekwoyi ge wo la fa ɓeda ɓo, ntu dna ɓo kurum. 20Ɓa to mi ɓa mizhi m, ntu nwa awyidna ɓo. Gama nyakpa doho-dohoi n kwo ɓei to epei, kwo ɓei la fi. 21Kwo ɓei zhin oɓo dnawo nya nu, Musa nwohin wo ɓei ku dna wo, wa gna ge, “Mi vin lo mi-i wo dna.” 22Amma fye ku ɓe Sihiyona pe, kwo nu zhin Urushelima eshe nya. Fye ku ɓe amalaika yezhi ba, agmada ʼba. 23Fyehin kwa wato zaho-zaho n wo eye katu lo n Shemi, fye ɓe Shekwoyi-wada yi aba, fye ɓe azafun aza gni-gni yi nya aba. Ɓa lo n ʼshe, ɓa ku ze n nu-nuyi. 24Fye ku ɓe Yesu aba n wo zhin yi viye yei n alkawali woi-woi aba nyi. Fye ku ɓe Yesu ami aba n ɓa zhin za gafara nyi. Owo ami du Habila nya lo. Habila ami ɓei zhin nya nu n na ɓa gbata.

25Kna wo ɓeda tnubua n wo daɓo n hoi nyi. Abei ga a Israila yi tata ntu ge ɓa ɓei zun Shekwoyi ɓeda gna-na n Musa ʼgbe, oza n wo zun wo ɓeda gna-na n Yesu gbe wo ɓa gna fifi nu. 26Shekwoyi begye nu kawai ɓei zhin anyi ɓa shan-shan, sanu wo ɓei da ɓo tu n Sinai pe nyi. Sanu wa je ɓo da duk ɓedo n ʼshe yi kwo ɓei shan-shan. 27Shekwoyi ɓei shi nya ya nkwo to na gbegye yi lon, anya n ɓa mi zhi lo ɓa nu ɓei ce zhi kawai. 28Shi yi nbegyi lo, n zaho ta mi nkwo gwoya nyin, yi zhin ɓo nkwo ɓa da Shekwoyi, yi zhin wo bauta, nbugba godiya nya yi, yi ga wo mwa-mwa ndanwoyi. 29Ntu ge eyi Shekwoyi zhin ona nu, nkwo gyi aba nyi.